العقل بالكف - بقلم : محمد موسى عساكره
الخميس | 03/08/2017 - 07:07 مساءاً
العقل بالكف - بقلم : محمد موسى عساكره

وهم بالطريق الى المدرسة .. ماسك ايد امه .. و صارع راسها اسئلة كالعادة
بده يعرف اي شي بيشوفه .. و شو بيعمل و كيف و ليش
ولد صغير بعمر الاسئلة يلي مالها نهاية
_شو هاد البيت لكبير!؟
- هاد بيت بلاستيكي .. للزرع و النباتات ..
- ليش النباتات إلهن بيت ؟؟ مش بس  تراب و شمس ؟
- حبيبي .. في نباتات ما بصير تتعرض للبرد ولا بتموت  ... و بالشتوية هالبيوت بتكون مدفية منيح .. و في واحد بيعتني فيهن و بيحطلهن ادوية و سماد ..
- اها ... مثل بابا من زمان .. قبل ما يسافر ...طيب ليش ما نسكن مع النباتات و منتدفى ؟؟ مش احسن من بيتنا يلي شبابيكو مخلوعة ؟
- ما بصير حبيبي .. هاد البيت بس للورود و الزرعات
استغرب ..
كملو مشوار .. و كمل مراقبة و اسئلة ..
- شو هذول الولاد على واجهات المحلات ؟؟ يلي لابسين بلايز شتويه و جاكيتات ؟
- هذول مش ولاد .. هذول تماثيل .. لعرض الملابس .. مشان الناس تشوفهن و تشوف كيف موديل الجاكيت عاللبس ، قبل ما تشتري
- ما بقدر انا البسهن ؟؟
- لا .. نحن ما معنا حق هيك جاكيت .
- مش نشتري .. بس بلبسهن و بضل واقف عالواجهة .. مثل هالتمثال .. و هيك الناس بتشوف شكل الجاكيت .. و انا بدفى منو ما يسكر المحل ..
- ما بصير .. انت رح تتحرك .. هذول لازم يكونو تماثيل .. جامدة يعني
استغرب .. ضم جاكيتو القديم محل السحّاب المنزوع ..
كملو مشي .. و كمل مراقبة
اشر على دعاية قدام عيادة و صاح
- ماما شو يعني معاينة تصريح سفر ؟؟
- يعني ورقة ممكن تدخل فيا لغير بلد ..
- تعي ناخد ورقتين و نسافر عند بابا  !
غصّت و جاوبت
- حبيبي .. هاي عيادة بيطرية .. بيفحصو الحيوانات .. و بيعطو ورقة انو الحيوان ما فيه ولا مرض .. مشان يدخل على غير بلاد
- طيب مناخد ورقة من دكتور الانسان .. شو رايك ؟؟ .. طبعا مش هسا  .. بس ما يكون فيني ولا مرض .. و منسافر .
- حبيبي البني ادم ما بيكفيه هالورقة .. ما بتقدر تسافر .. الا اذا عندك مصاري كثير .. بيستقبلونا وقتها كم بلد
- بس الحيوانات ممكن تسافر لاي بلد و بيستقبلوا الكل ؟؟

استغرب
مسح منخارو البردان .. ضم جاكيته محل السحّاب المنزوع مشان ما يدخل الهوا البارد
و كمل مشي ..
قعد بمقعده .. جنب بقية الطلاب
و صار يسمع المعلمة عمتحكي و تشرح امور غريبة عن عالم غريب و خيالي
امور بدائية .. ما بيفهموها الصغار و يستوعبوها الاطفال
عن الحياة و المخلوقات ..
عن الارض .. كيف فيا نبات .. حيوان .. و جماد
و طبعا الانسان .. يلي هو اعلى و ارقى كائن و اهم شي من كل هذول
مع انو الحكي بسيط
بس هو ما فهم .. و لا استوعب .. و ما عنده قلب يسأل 
سرح بخياله ..  اذا كان عنده خيار .. شو كان اختار يكون ؟؟
نبات عنده بيت ؟
جماد لابس جاكيت و دفيان ؟
ولا حيوان مع ورقة ممكن يسافر و اي بلد بيستقبله ؟

والله شي بيحيّر ..






التعليـــقات

اعلان خارجي
 
طقس فلسطين

أوقات الصلاة
الفجر 06:15
الظهر 12:49
العصر 03:38
المغرب 05:57
العشاء 07:23
استفتاء السلام
من يتحمل مسؤولية ارتفاع الخضار والفواكه في الاسواق الفلسطينية ؟
0
0
0

ينتهي التصويت بتاريخ 24/07/2018

فوائده لا تحصى.. لا ترم قشر البصل بعد اليوم
تلفزيون السلام - فلسطين : من يتوقع أن تحمل قشور البصل التي نتخلص منها يوميا فوائد تفوق ...
تحذير هام للأمهات ...لا للكورن فليكس في إفطار أطفالكن
تلفزيون السلام - فلسطين :  تتجه السلطات الصحية البريطانية إلى تحذير الآباء من تقديم رقائق الذرة والشوكولاتة ...
للنساء ...فوائد خفية ومذهلة للحمص
تلفزيون السلام - فلسطين : يحمي الحمص الذي يحتوي على البروتين والألياف من أمراض خطيرة مثل السرطان ...
ضمادة "كهربائية" تسرع شفاء الجروح !
تلفزيون السلام - فلسطين :  توصلت دراسة حديثة إلى أن ضمادة مطورة تولد تيارا كهربائيا لطيفا، يمكن ...
مخ الأطفال في خطر.. بسبب الأجهزة الذكية
تلفزيون السلام - فلسطين :  يواجه الآباء، الذين كانوا يشعرون بالقلق من أن أطفالهم يقضون وقتاً طويلاً ...