الثلاثاء | 19/03/2024 - 05:19 صباحاً - بتوقيت القدس
اجاني اليوم طلب صداقة من بنت ما بعرفها
بالغالب ما بقبل طلبات صداقه من حدا ما بعرفه .. بس هاي كان الها مشكلة وحدة بس :
البنت للأسف بتوخد العقل !! لازم اكون بعرفها .. الا ما كون شايفها و متعرف عليها و ناسي.....لازم اقبلها ..
بعدين شو هالقوانين التافهة انو ما اقبل حدا ما بعرفه يعني ؟؟ مين انا مثلا ؟؟ راغب علامة ؟؟
شوفو شو صورتها حلوة و لطيفة , و هالشعر الاسود الطويل المجعد , و العيون الواسعة يلي بتلمع بهالصوره , ضحكتها يلي بتشرح النفس و بتخليك تحس انو اجتك الفيزا ؟
وشو حنونة بهالصورة ..لافة جدتها الختيارة و بتبوسها بحنان , الها اكثر من صورة مع التيتا .. و بيدّلو انو هي شخص محب للعائلة و بيحترم الاكبر منه و جدير بالثقة و المسؤولية و الصداقة … صداقتي
بكرا ممكن تعتني بأهلي و تعاملهم منيح بس نرتبط و …
لازم اقبل الطلب .. بيكفي غرور و اكل هوا , كبست زر القبول بكل حماس .. و صفنت .. شو ممكن ابعتلها ؟؟شو ممكن قول ؟؟ بدون ما بيّن متسرع وميت عليها ؟؟
فجأة .. بعتتلي هي !!!!
- مسا الخير .
مسا الخير ؟؟؟ يا عفو الله
لازم خبر اهلي , خلي امي تنزل تشتري فستان رسمي و أبوي يوخد اجازة بعد اكم شه شهر , بكون حجزت الصالة و اتفقت مع المغني و اشتريت خواتم و طبعت الكروت ....
آل معطي يتشرفون بدعوتكم لحضور زفاف ابنهم محمد و الانسة ..
- شكرا لانك قبلت صداقتي .
بتتشكرني !!!
يااااااا الهيي .. كم لبثنا....... يا الهي عالتهذيب و الاخلاق ..
بكرا شو رح يطلعو ولادنا خلوقين و مهذبين مع هيك ام صالحة و مكرسة كيانها للتربية و بناء الانسان و الانسانية
بنتي خجولة .. رابطة شعرها باتزان و بدون ما تعطي وجه لحدا , وابني فارق شعره عطرف ومشغول بالدراسه و ما يرد عاصحابه يلي بيلعبو اتاري و فوطبول بالشوارع و يضيعو مستقبلهم .....بس لازم يلعب شوي معهم .......ما بدي يطلع منعزل كمان .....لازم فهمها هالشي من هسا .. مو عكيفها كل شي , مش معقول كمان .. ولادي هذول .. ترحمني شوي .. بلشت عصّب ها ..افففف شكلنا رح نتخانق ..
رجعت اطلعت عصورتها … لا … ما رح نتخانق ..
انا شب واعي و بالغ .. و هي بنت حلوة كثيير .. كل شي بينحل
- كيفك حبيبي محمد ؟
حبيبها محمد … انا محمد !! ... انا حبيبها يعني؟؟؟
وحياة الله حاسسني قلبي .. بتموت فيا الضرسانة .. بتتعذب صار الها سنين ......و مترددة تبعت او لا .. و خجلانة
مسكينة شو كانت حياتها صعبة .. و الوقت عندها بطيئ و الحياة مالها معنى من دوني , مقضيتا بتتصفح صوري و تتخيل امور غريبة .. و بتهتم بجدتها العجوز مشان تقدر تشيل مخها المريض شوي عن حبها الاول و الاخير .. حضرتي
- كثير بحب مقالاتك وقصصك يا ابني ..
ابني ؟؟؟ ابني اسكان عشرين طابق في عينك .. صحيح انا ما ببين علي العمر ولسا قلبي طفل و بريئ من جوا و ناصع و ابيض و ابوس كوعي
بس مش ابنك
- حفيدتي دلتني على صفحتك .. قالتلي اقرا قصصك .. و قال ما ضيفك لانك ما بتقبل حدا ما بتعرفه ..
كويس .. طلعت بحكي مع جدتها العجوز
طلعت هاي صفحة العجوز اصلا .. الها كم صورة مع حفيدتها حاطيتهن لتخدع الختايرة عالفيس
حفيدتها المدللة المغرورة الحلوة من برا و ما بتعرف انو الجمال هو جمال الروح .. جمال الداخل .. يلي ما بيتغير
حفيدتها يلي ما ضافتني
حفيدتها يلي طلعت متجوزة
بس اكيد مش سعيدة بزواجها
و ولادها قرود و شاقين الارض و بيلعبو بالحارة مع الزعران و يطاردو قطط و مستقبلهم ضايع من تربايتا الزفت
بتستاهل اصلا
شو رد عهاي هسا ..
احسن شي ما ارد
اصلا انا ما برد عحدا ما بعرفه ..
او …
ارد و اسأالها .. اذا ممكن اكتب هالموقف عصفحتي ؟
مشان العالم تتربى و تتعلم من تجربتي ؟
هو هيك
اذا بتقرو هالحكي هسا يعني هي وافقت او يعني ما فهمت شي و انا نشرتو بالحالتين .
الفجر | 05:23 |
الظهر | 12:47 |
العصر | 04:14 |
المغرب | 06:50 |
العشاء | 08:12 |