الأخبار :
الاحتلال يعتقل خمسة مواطنين بينهم أسيرة محررة في رام الله     خمسة قتلى حصيلة الهجوم على أحد الفنادق في مقديشو     حالة الطقس: ارتفاع على درجات الحرارة وأمطار غدا     تنبيه.. أسابيع ويختفي ‘واتس آب’ من ملايين الأجهزة !     العاهل السعودي يؤكد على حق الشعب الفلسطيني بإقامته دولته المستقلة     اردان يصدر مرسوماً يحظر أي نشاط للسلطة الفلسطينية بالقدس     العالول : حركة فتح مصرة على إجراء الانتخابات العامة     الاردن يسجل وفاة و8 حالات إصابة بانفلونزا الخنازير     اجتماع بين التربية والمالية لصرف مستحقات العاملين في امتحان الثانوية العامة     اجتماع فلسطيني اسرائيلي لبحث إلغاء قطع الكهرباء عن الضفة     اعتقال 11 شاباً رشقوا الأجهزة الامنية بالحجارة في بلدة سلواد شرق رام الله     احتراق عروسين اثناء قضائهما شهر العسل     الرئيس يهدد بإلغاء الاتفاقيات مع "إسرائيل" إذا ضمت الاغوار     الضفة الغربية .. الكهرباء الاسرائيلية ستقطع التيار الكهربائي لمدة 3 ساعات متواصلة     الشيخ : تقدمنا بطلب من اسرائيل للسماح باجراء انتخابات في القدس    
قصه بعنوان : جماعة هذيك المناطق، نظرهم ضعيف! بقلم : محمد موسى عساكرة
الخميس | 16/08/2018 - 10:52 صباحاً
قصه بعنوان : جماعة هذيك المناطق، نظرهم ضعيف! بقلم : محمد موسى عساكرة

" جماعة هذيك المناطق .. نظرهم ضعيف "

بآخر اليوم  .. باحدى الحارات الشعبية المعتمة يلي دايما اراضيها طين، صف سيارة التكسي القديمة قدّام البيت القديم المهرهر
دخل عالبيت .. شلح من اجرو .. ورمى مفاتيح السيارة عالطاولة الخشب المكسورة 
قرفص و قعد عالارض  بالغرفة الوحيدة بالبيت ..
طالع من جيبتو خمسين دولار .. و حطّها عالارض قدامو .. و قعد يتأملها
مرتو قاعدة بالزاوية بتخيط و ترقّع جرابينو للمرة الالف
الجراب ما ضل فيه اي خيط من مكوناتو الاصلية .. كلو خيوط الترقيع
ابنهم الصغير بيبكي من الجوع  .. 
- كيف كان الشغل اليوم ؟؟ انشالله في توصيلات ؟
- لو تعرفي .. شو صار اليوم .. شو شفت اليوم ... بتوصيلة وحدة ..
جاوبها و هو سرحان
- توصيلة وحدة بس ؟؟؟ وين كنت  كل اليوم ؟؟ و من وين جبت المصاري  ؟؟ انشالله بلشت تسرق ؟ 
اخد نفس عميق و جاوبها و هو بيحاول يسكّت ابنو الجوعان 
- توصيلة وحدة اخذت كل اليوم ..
نزلت على هذيك المناطق .. قلت بالك الله بيبعتلي شي زبون دفّيع
و فعلاً وقفتني بنت .. صبية .. معها كلب صغير
قال مستعجلة .. و حالتها طارئة ..
و طلبت وصلها عمنطقة  من هذيك المناطق
كانت تحكي عالتلفون و تصرخ بهلع
( بوني .. صرلو يومين ما اكل .. كتير خايفة عليه .. جبتلو كل انواع اللحم .. ما بعرف شو صايرلو )
طلعت مش هي المريضه .. الكلب ...
قبل العيادة بشوي طلبت مني وقف السيارة .. اخدت بوني ..
استنيتها برا بعيد شوي مثل ما طلبت مني
بعد نص ساعة طلعت .. رجعتها عالبيت .. واستنيتها برا .. بعيد شوي عن المدخل مثل ما طلبت مني ..
طلعت من البيت .. مغيرة ثيابها .. لابسة خفيف و قصير و قبعة قش عريضة .. و معها شنتاية  كبيرة
طلبت وصلها عالمسبح يلي فاتح جديد برا البلد
نزلتها قبل المسبح بشوي .. مثل ما طلبت مني .. و قال اجي اخدها بعد ساعتين
صفيت السيارة بكراج المسبح .. و قعدت اتفرج عليهم من برّا من ورا السور
لو تعرفي شو هو مسبح يا مرا .. 
المي بطرطش بكل مكان للسما .. و في اربع بحيرات صغيرة و نهر صناعي .. و زحاليط فيها المي ما بتوقف
المسبح اشبه بجزيرة وسط المحيط
بعد ساعتين .. طلعت مع مجموعة عالم .. اشرتلها مشان تشوفني انو انا صافف سيارتي قبالها ..
بس ما شافتني قد ما هويت .. و ما سمعتني قد ما صرخت ..
كأن جماعة هذيك المناطق نظرهم ضعيف .. او ما بشوفونا منيح لسبب ما .. 
بعد ما راحو كل رفقاتها .. اتجهت لعندي .. و طلبت وصلا عالبيت بانزعاج
وصلتها .. و لحالي وقفت بعيد عن مدخل بيتها .. بلا ما تطلب مني ..
رمتلي خمسين دولار من الشباك و راحت ..
و انا هاي رجعتي عالبيت ..
يلا قومي حطيلي شوية مي خليني اتغسل .. كثير شوب

جاوبت مرتو بغيظ و غيرة واضحة :
- المي مقطوعة .. صرلها اسبوع ما اجتنا مي حبيبي .. ولا رطوبة هذيك المناطق نستك جفاف منطقتك ؟؟ 
- دخيلك .. رح ضل مشوب .. ارحم من برد الشتا  .. بكرا رح نشتاق للشوب ..
وانتي بلا صغر عقل و تعالي نقرر شو رح نعمل بالخمسين دولار

ركضت قعدت جنبه عالارض بحماس .. و على اصوات بكي ابنهم  الجوعان ..  صارو يتخيلو و يحلمو ..
احلام بسيطة لا تتخطى حدود الاساسيات و لا تلامس خطوط الرفاهيات
احلام حدودها خمسين دولار .. و بنفس الوقت مالها حدود 

بآخر اليوم  .. ببيت ثاني .. بمنطقة ثانية .. من هذيك المناطق

صبية رمت شنتايتا الكبيرة و قبعتها القش بغرفة النوم
و طلعت من الحمام ، لافة حوليها منشفة ..  
جوزها قاعد عالاخبار .. سألها بدون ما يلتفت و بعدم اكتراث واضح :
-  مين شفتي اليوم ؟؟ كيف المسبح .. ؟
جاوبتو بغضب و خنقه :
- مين بدي شوف يعني ؟؟ ما شفت حدا .. المسبح زفت شو بدو يكون ..
لو تشوف موديلي وقت كلهم رجعو بسياراتهم  .. بس حضرتك مشغول تجي توصلني .. 
- شهر الجاي بس ارجع من اوروبا .. رح اشتريلك سيارة .. بس ما تنقي و بعدي من قدام التلفزيون .. خلينا نشوف هالمجانين شو بدهم .. 

عالشاشة .. قناة محلية .. تندد تستنكر و تحارب ..  و تؤكد على وحدة الشعب الفلسطيني

- اي قولتك ..  والله مجانين .. شو بدهم احسن من هيك ؟؟ يعني والله عايشين مع بعض و عين الله علينا .. من وين طلعولنا هذول

تمتمت و هي تفرش الارض بكافة انواع اللحوم .. للكلب بوني المتستلقي و بيحرك دنبو
وبيسأل حالو باستغراب :
ليش ما حدا مقتنع اني مش جوعان ؟؟!






التعليـــقات

اعلان خارجي
 
طقس فلسطين

أوقات الصلاة
الفجر 06:02
الظهر 12:32
العصر 03:16
المغرب 05:35
العشاء 07:02
استفتاء السلام
هل برأيك ستجرى الانتخابات في القريب العاجل ؟
0
0

ينتهي التصويت بتاريخ 22/11/2019

تنظيف الأسنان يقي من أمراض قلبية
تلفزيون السلام - فلسطين : أشارت دراسة أجراها باحثون بجامعة إيهاوا النسائية في كوريا الجنوبية، إن تنظيف ...
شركة يابانية تقدم "بخاخا" يخفي التجاعيد ويمنحك "بشرة جديدة"
تلفزيون السلام - فلسطين : تخطط شركة مستحضرات التجميل اليابانية Kao Corporation (كاو) لبيع منتج تجميل جديد ...
انتحار طفلة بسبب هاتف محمول
تلفزيون السلام - فلسطين : أقدمت طفلة صغيرة لا يتجاوز عمرها 8 سنوات، على الانتحار أمام أحد ...
احذر هذه الأطعمة تزيد الصداع النصفي
تلفزيون السلام - فلسطين : يؤثر الصداع النصفي على بليون إنسان، وفقاً لتقديرات منظمة الصحة العالمية. وتصاحب ...
8 فوائد رائعة للأفوكادو
تلفزيون السلام - فلسطين : فاكهة خضراء مصدرها أمريكا الجنوبية، وتمتاز بالمغذيات التي تحمي القلب والدماغ. ولأن ...